गीतम् - नमस्ते शुभे वाणि

नमस्ते शुभे वाणि तुभ्यं नमस्ते॥

नमस्ते सदा शुभ्रपद्मस्थितायै

नमस्ते सदा पूर्णसत्त्वालयायै

नमस्ते सदा भद्रगिर्देवतायै

नमस्ते सदा देवतावन्दितायै॥

नतार्तार्तिमेघालिवातूलदृष्ट्यै

प्रजिज्ञासुसंवित्पिपासाम्बुदायै

सदार्थार्थिकल्पद्रुमाङ्घ्रिद्वयायै

मुमुक्षातुराणां विमुक्तिप्रदायै॥

नमस्ते शरत्कालपूर्णेन्दुवक्त्र​-

प्रकाशेन विध्वस्तकर्मोच्चयायै

नमस्ते विपञ्चीस्वरालापनोद्भूत-

सम्फुल्लितस्वान्तमुन्याश्रितायै॥

नमस्ते महाकाव्यमार्गेण वाल्मीकि-

मुख्यार्यगी:कोटिभिस्सन्नुतायै

नमस्ते लसत्सामविद्याकलाचारु-

गीतादिभिर्दीक्षिताद्यै: श्रितायै॥

क्वणत्कङ्कणाद्यै: रुचालङ्कृतायै

महेन्द्रादिबृन्दारकैर्वन्दितायै

जगल्लीलया हासमानाननायै

रसस्निग्धमद्वाचि सम्भावितायै॥